魚香茄子 (V媽媽做法酒樓味道版)

點解我講明係"V媽媽做法酒樓味道版"呢?

因為其實魚香茄子依個餸我之前已經整過無數咁多次! 不過以前一直都係整"李X記魚香醬版"，加上以前喺蘇格蘭好難買到梅香鹹魚，所以整出來味道始終爭d~
上次返香港V媽媽整過比我食，同出街食到既味道一模一樣!
  而家依度又可以買到梅香鹹魚，所以今次用咗V媽媽既方法來煮......果然係正!

1. 柳枚肉剁碎，用胡椒粉、生抽、紹酒、糖、清水少許、雞粉少許、麻油少許和粟粉撈勻醃好備用。

2. 梅香鹹魚1片去清骨後將肉切小粒備用。

3. 茄子2個洗淨，去蒂和切粗條; 燒熱油放入茄子段炸約20秒後撈起，放在廚房紙上吸去多餘油份。或可燒熱3湯匙油將茄子段炒至開始軟身，再盛起瀝油備用。(炒時可加入少許清水，比較易炒!)

4. 燒熱油鑊爆香薑絲和蒜蓉，下豬肉碎炒一會後灒酒。

5. 加入梅香鹹魚粒炒香。

6. 茄子段回鑊兜勻炒至熟，用少許糖和雞粉調味。

7. 勾生粉水芡兜勻後上碟，灑上蔥花即成。