二人世界的三餸一湯 - 10月22日 (附食譜)

粉葛紅蘿蔔赤小豆扁豆湯; 鹵水拼盤; XO醬翠玉瓜炒貴妃貝 & 椒絲腐乳菠菜

以前都整過鹵水雞翼之類，不過全部都係用李錦記; 今次特登買咗包鹵水汁試吓自己煲鹵水汁!

 不過我真係服咗佢 - 個煮法指示只係講咗加水 + 煲幾耐...用幾多料呢? 加幾多水呢??? 完全冇提過!!!

個人睇佢咁既材料 - 煲出來既鹵水汁應該冇味果喎~~~ 所以我決定斷估 - 成包料用哂 + 水既份量完全靠估~ 再加d生抽、老抽、紹酒、冰糖.....自己較味~~~~ 我加材料時冇量住幾多，所以唔洗問我份量嘞! 我唔知架~~~~

 今次碟野好大碟 - 有牛腱、豬脷、豬心、雞翼 + 鹵水蛋~ 一唸起想整鹵味，就樣樣都想食!!! 樣樣都買少少......結果變咗一大碟~~~~~

V媽媽今次老貓燒鬚!!!

事源4月時老公返香港搞丁屋野，因為事出突然，我冇跟老公一齊返香港~ 所以我寫咗張list 比老公幫我去辦貨...而單上有一項係"罐頭鮑貝"~ 老公係完全唔識中文既中文文盲來，佢識鬼去先樹買鮑貝咩? 咁就緊係託V媽媽帶老公去買啦~~~~

當V媽媽睇到老公比佢既清單，就打電話來鬧鬼我: 鮑乜鬼野貝吖? 妳叫佢買埋依d野咁重(睇吓V媽媽幾鍚女婿!).....成日食埋哂d膽固醇野! 唔買呀~~~ 我買2罐罐頭鮑魚比妳啦!

我當然鍾意食鮑魚~ 但我都鍾意食鮑貝喎! 而且鮑魚我平時唔捨得開來食嘛......經我 + V媽媽一輪拗數後，最終結果係V媽媽買咗鮑貝比我...2罐咁大把! 罐頭鮑魚當然照要啦~~

咁點解我話V媽媽老貓燒鬚呢? 因為V媽媽買錯咗!!!!

 尋晚一開罐 - 係貴妃貝! 唔係鮑貝!!!!

其實老公4月返到來時，我都有問過V媽媽 - 點解個罐寫住貴妃貝唔係鮑貝既? (我當時唔知係兩樣野來!) V媽媽就話: 一樣架嘛吓哇!?!? (唔太肯定~) 我點鬼知~ 我都唔食依d野既! 貴妃貝鮑貝咪又係果d野來......

V媽媽~ 妳錯咗嘞!!! 口感係完全唔同架......雖然都幾好食~ 不過我都係鍾意鮑貝多d!!

粉葛紅蘿蔔赤小豆扁豆湯食譜click here~

鹵水拼盤食譜click here~

XO醬翠玉瓜炒貴妃貝食譜click here~

椒絲腐乳菠菜(參考食譜)click here~