Shopping@TK Maxx 之"我要讚人" (2010年3月14日)

尋日(3月14日)係英國既母親節~  由於99早3星期又返咗香港，所以尋日T家並無任何慶祝活動......

不過作為老公既醒目老婆 - 即係我自己，一早已代工事繁忙既老公上網訂咗一大札花越洋送去比99!  (嘻嘻~~~ 承機讚吓自己先!) 希望99會鍾意札花啦!

至於V媽媽呢......佢今次無份呀! 留返香港既母親節先啦!!

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
尋日同老公去咗行街shopping，店舖開始轉季，不過款式引唔起我多少興趣!

收穫如下........

我發現自己喺英國high street 越來越難買到合身既衫......

除咗款式唔合我心水之外，仲因為真係太太太少細碼!!!!!

 喺Primark 買咗件減價浴衣，千辛萬苦先比我搵到件12/14 (中碼)!!!!

貨架上幾乎全部都係20/22(加大)~ 而我呢係著8/10(細碼)，不過摷咗好耐都搵唔到......中碼都照殺啦! 所以反正浴衣都係喺屋企著既啫~~~~

款又唔啱，碼又唔啱......行唔夠2、3間，都係走去睇廚具咯......

- Lakeland 復活節theme 包裝袋;

- Lakeland 餓姦力麵包改良劑;

- KitchenAid 洗碗布;

- 靚靚通花杯仔蛋糕套;

- Lakeland 玻璃紙Jam Covers;

- Butter Curler;

- Wilton 手板腳板曲奇模~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
已經好耐無行過TK Maxx (其實都只係幾個星期左右! )，襯weekend 一次過行哂2間分店! 

最近出街成日遇到衰人，

尋日終於比我遇到個好人嘞!

尋日喺其中一間TK Maxx 分店，見到一批新貨 - 早前去羅馬旅行時見到d我好有興趣既海鮮立體餐碟!

點為之立體餐碟呢?

其實係一隻陶瓷餐碟上，碟邊有同樣係陶瓷造成既立體龍蝦、大蜆、青口、海草......等裝飾圍住，中央就用來放食物! 造型非常盞鬼~~~~  不過礙於餐碟好重又大隻而且幾鬼貴，所以喺羅馬時我好有興趣但都無買到......

講返尋日......尋日我喺TK Maxx 見到依批唔同形狀大小既立體餐碟，我即時流哂口水，急不及待開始我既磨爛蓆研究!

每隻餐碟都有bubble wrap 包住，再裝喺一個印有餐碟款式既硬咭紙盒裡面，我睇中一隻圓形既海鮮立體款式......

正當我打開紙盒拉出餐碟來研究實物時，只拉到餐碟既一半，突然紙盒裡面另外果"半隻"隨即嘭一聲跌落地!
依半隻餐碟原本喺盒裡面已經爛鬼哂，跌落地後直頭變為粉碎果隻!
 周圍既客人同一時間朝住"嘭"一聲既方向望過來 - 即係望住我!!!

事出突然，正當我不知所措 - 唔知應該叫人來，定拿拿淋入返隻碟落個盒既時候，有一位年約廿多歲既靚仔店員從遠處行埋來......

我: 隻碟喺個盒裡面原本已經係爛咗架嘞!

(其實我從來無驚過! 因為真係唔係我打爛既!!若果佢地屈我比錢既話，我會叫佢地check CCTV~ )

靚仔店員: 唔洗擔心~ 我會搞掂! Are you OK? 妳有無整親自己?

我: 我唸可能之前有人打爛咗就咁放返入個盒......

靚仔店員: 唔緊要~ 我去攞工具清理，妳要小心地上碎片啊!

雖然真係唔係我打爛，但我始終覺得自己帶比人地麻煩 + 唔好意思......

不過靚仔店員全程帶住有禮可親既陽光笑容，令我感覺良好，即時減少咗尷尬感覺!

佢果種完全唔care 件貨既態度，仲不停問我有無整親 + 叫我小心~ 作為顧客既我感到受重視，咁先係待客之道架嘛!!!
  
若果我仲係十幾歲既懷春少女，我可能會好似萬寧妹妹咁即時有少少鍾意咗佢~~~~~

其實我知道外國有好多大公司，每個月都有個"losses budget" - 即係店裡貨品有咩損毀都好，喺大部份情況之下都唔需要顧客付責既!  (當然故意破壞不在此列啦!)

我唔知TK Maxx 係咪一樣有咁既policy? 不過無論有或無都好，我搞到對方要掃地，對方並唔一定要比好面口我睇......

靚仔店員係咪真係靚仔呢?

係! 雖則佢並非我心水類型~  但所有對陌生人都真誠有禮既人，就算係阿公阿婆，喺我心目中全部都係靚仔靚女!

我向靚仔店員道謝後 ，就繼續睇其他廚具......

咁個餐碟呢? (同款仲有幾隻貨......)

我無買到呀~ 因為太鬼大隻!!!