孖T超級黑仔日 - 五星級酒店既玻璃碎 (2010年3月21日)

今日(3月21日)真係我 + 老公既超級黑仔星期日!!

黑仔1

今朝老公打電話去Hilton book 枱食lunch buffet~ 不過接電話既侍應生幾乎一律唔識英文!!
(Hilton 好多侍應係來自其他歐洲國家既半工讀生~) 

最後老公斷斷續續打咗2通電話去Hilton，同最少6、7個人喺電話中交涉，足足搞咗45分鐘先成功book 到枱......

黑仔2
臨出門口我發現唔見咗1隻鑽石耳環!

不過估計應該喺屋企，所以希望會搵得返啦~~~~~

黑仔3
依隻黑仔係今日最大鑊果隻黑仔!

去到Hilton 侍應帶我地埋餐枱，屁股都未坐落張櫈，我見到老公張櫈些少麵包碎，於是叫老公抹咗麵包碎先坐低......
前後都唔夠2秒....... 老公成隻右手都係血!

老公即時攞起枱上既餐巾包住，成塊餐巾即時染滿哂鮮血!  真係好勁果隻!!!

 罪魁禍首係依塊約1吋長既玻璃碎!  

 
張櫈 + 地下都有血跡!

(老公及時用餐巾包住傷口咋，如果唔係仲多血呀!!!)
喺一旁既侍應即時嚇呆，過咗幾秒先識反應叫經理來......

為免影響其他食客，佢地帶咗老公出酒店大堂消毒 + 包紮傷口~

我喺餐枱度影完相 (要保留証據嘛!)

有咩事追究起上來要講証據!!再出去大堂睇吓咩情況......

出到去見到有4個人圍住老公，有人舉起老公隻右手，用消毒藥水幫老公抹緊傷口!

 睇唔到個傷口有幾深 ，不過應該係關節位! 幫老公包紮既女經理問咗幾次: 點解唔止血既? (嚇得我吖!!!! )

搞咗成半粒鐘，老公填咗張form，佢地又幫我地換枱...我已經咩胃口都無哂!

(咪睇我成日睇恐怖片......查實我係好怕血既 - 真既人血!! 怕既程度係 - 就算喺香港間中喺街邊見到流動捐血車，我都會成身軟哂果隻!!!)
佢地不停道歉~ 仲攞咗枝唔知咩酒出來話要請我地飲，但我地婉拒咗!

我真係頂唔順d西方人! 

平時見佢地食乜都無酒不歡......而家求其包住我老公隻手指先叫做勉強止到血，仲請佢飲酒?

係咪想佢d血行快d流死佢為止呀??

知道老公無咩事後，我稍為放鬆少少就頂唔順喊咗出來!

老公就烚熟狗頭，嬉皮笑臉 調返轉頭氹我笑......

 老公: Honhon 妳睇~ 妳睇~ 我無事呀! 都唔痛既!! (一路講一路不停郁包紮咗既手指......)

我: 流咁多血點會唔痛呀? 你都唔知係唔係人來架??

老公: Honhon~ 講d野妳知吖 - 妳隻戒指大粒過頭先幫我包傷口個女經理果隻好多呀!

我: 你一定好爽啦! 比個靚女摸住你隻手咁耐!!

老公: 妳覺得佢好靚咩? 佢好似無咗1隻牙果喎!

我: 你都唔知我幾擔心你!!!!

老公: 我知~ 如果係妳整親我都會好嬲! 不過我真係無事吖嘛~ 最多一陣食返多d野補返囉!

雖然我已經無哂胃口，但因為成日都未食過野，所以最後草草食咗2碟燒牛肉......不過就完全無心情影相嘞!

 嚇到我連自己最鍾意食既雞肝醬都唔見到! 不過老公見到攞咗比我，勉強食咗2兜~
平時我點止食得2兜咁少呀?

今日個Crème Brulee 好鬼正!!! 唔太甜仲好鬼有蛋香~~~  (食咗一啖先記得影相!)

無胃口都食咗1兜! (我平時唔食甜品架嘛!! )

從未試過喺Hilton 食buffet 食得咁唔enjoy!

真係太危險 + 唔可以接受嘞! 

而且我真係比老公嚇壞咗，又擔心又心痛!!

不過酒店方面好有誠意道歉，搞到我都唔好意思發脾氣......事實上我由頭到尾都無發過脾氣!

一來依種情況下發脾氣都於事無補;

二來喺未清楚老公隻手情況之下，我一定要保持冷靜同佢地交涉;

另一方面我亦唔想令任何西方人有所誤會 - 中國人有事發生時，會借故發爛咋想搏食霸王餐! 

我地好滿意酒店方面handle 今次意外! 我地都知佢地只係無心之失，唔通真係搏比人告到甩褲咩?

其實我地根本無期望過 / 打算要求酒店方面作出任何補償~ 所以我地食完野時係照叫埋單既!  而且我地一早都打算以後會繼續幫襯...... 不過當我地食完野埋單時，女經理再次同我地道歉，亦唔需要我地埋單!

黑仔4
黑仔呀呢? 不過仲未完喎.......

食完野後去泗和行買餸，買完餸後唸住返屋企啦! 點知老公行錯線......

咁老公就問我: 行錯咗線~ 想唔想順便去埋中英行?

咁就去啦!

去到中英行入口 - 一出一入既雙線行車，有條茂利阿叔偏偏要行中間!

老公及時避佢架車，左邊車身刮到入口度閘花鬼哂!!!!

架車又要入廠!!! (相都唔想影呀!!! )

乜mood 都無鬼哂! 返屋企嘞!!!