剛過去既weekend，我地連續2日睇咗2套上一篇提過想既戲 - The Lovely Bones + Legion~
原本星期六係打算先睇Legion 既，點知出門口後渣車渣到一半先發現改咗路!!
去到戲院已經錯過咗Legion 入場時間，於是改睇遲15分鐘開場既The Lovely Bones - 反正都有打算睇依套!
The Lovely Bones 改編自Alice Sebold 2002年出版既同名小說~
1973年12月6日，14歲既Susie 收到一個好消息 - 自己心儀已久既男孩子Ray 邀請週末約會; 但同一日放學返家途中，Susie 遭戀童連環殺手鄰居殺害~ 枉死既怨憤、未圓既心願 + 對家人既留戀不捨，令Susie 一直唔肯去天堂......
睇戲前我一早已對戲既內容略有所聞 - 關於戀童癖病態殺手，同時亦有謀殺既情節......所以買票時睇到戲只係12A我覺得好意外!
雖然殺手既戀童癖部份既交代只係令觀眾意會，但謀殺既部份畫面震撼! 直至戲完場，我 + 老公都認為此戲最少應定為15!
The Lovely Bones 喺英國口碑好麻麻，好多影評人只比1至2星~ 但我自己反而幾鍾意! 雖然戲overall 有好有唔好，我 + 老公都認為比我地原本預期中好睇~
- 導演Peter Jackson...... 佢將一個內容沉重，同時帶有敏感社會禁忌 - 戀童謀殺既故事，拍得色彩斑斕豐富，畫面奇幻如仙境一樣咁靚!
(有少少令我唸起Tim Burton 既Big Fish - 大魚奇緣);全戲亦並非只有煽情沉重既情節，當Susie 既失蹤令一家人面臨崩潰既時候，鏡頭一轉又輪到搞笑既外婆出場來緩和一吓氣氛，即時減輕咗整套戲既陰暗感覺;
Susie 妹妹Lindsey 偷偷潛入兇手屋企搵罪証，被兇手發現及時逃走既一場戲，氣氛拍得異常緊張! 依場戲令我非常投入 + 肉緊!
我一直大力緊緊拖住老公隻手，連抖氣都唔敢太大力，生怕兇手真係會捉到Lindsey......
戲裡面既佢完全表現出子女音訊全無，為人父母果種焦急徬徨既心情; 後來警方告知佢女兒好可能已遭殺害，接近崩潰邊緣既佢一方面仍然緊記曾經對女兒許下既承諾; 另一方面誓要搵出女兒既兇手而作出種種瘋狂行為......令仲未為人母既我，深深感受到父親對女兒果種唔可以再愛得更多既感情!
唔好既有......
- 雖然上述好既方面有奇幻色彩斑斕豐富既畫面，但同時依個亦係唔好既地方 - 因為依種電腦畫面全戲實在太太太多嘞!!!
我未睇過原著小說，或者原著小說中有類似既描述~ 但我 + 老公都認為依段無乜必要，對全片劇情發展作用不大!
- 少部份劇情老土到令人尷尬 - 尤其係Ray 追Susie 既部份......睇到佢地2個我想拎轉個頭!
但始終唔係一個愉快既故事......
完場後老公同我講: 最後Susie 靈魂見到Ray 時，應該即時叫Ray 阻止Mr. Harvey 揼自己屍體落個窿嘛! 點會反而叫Ray 鍚自己架???(P.S. Susie 靈魂上咗一個會通靈女仔身上，希望一圓同Ray first kiss 既心願~)
我自己都做過十幾歲~ 十幾歲時情竇初開，對愛情充滿憧憬既時候，終於等到自己心儀已久既人向自己表白，但可惜只差一步......
變成靈魂既Susie 知道自己永遠無可能好似平常少女一樣，正常長大拍拖結婚生小朋友，唔可以同其他人一樣擁有正常既人生......果一種遺憾，我相信好多人都會好似Susie 咁選擇!
之前睇過一d關於變態連環殺手真實個案既書，發現大部份病態連環殺手就算已伏法被終生監禁，甚至被判死刑，佢地都唔會完完全全供出自己所犯過既全部罪行~ 佢地會保留部份令佢地自己印象最深刻既罪行，可以滿足佢地變態既回憶 + 可以留名於世上......
就如戲中Mr. Harvey 事敗後即時將Susie 既屍體運走掉棄入垃圾堆填區，令Susie 家人永遠搵唔到一樣......依d咁既case 現實中存在無數，除咗令受害者永遠唔可以安息之外，同時令受害者既家人終生得唔到解脫......真係好PK!
沒有留言:
發佈留言