而家係英國時間清晨3.53am~ 
做咩鬼我仲唔瞓覺?? 喺度打blog??? 其實我 + 老公尋晚食完黑松露同龍蝦後，晨咁早已瞓鬼咗......
大約1粒鐘前左右有位鄰居拍我地門，當老公去應門時，對方告知老公架車前擋風玻璃剛剛被一個身穿有帽綠色衛衣既打靶仔，攞大舊石頭扑爛咗!
擋風玻璃裂哂，不過無穿到，但已經完全唔渣得......
由於係公司車，老公唸咗一陣就決定 - 繼續瞓，瞓醒先報警!
大約過咗25分鐘 - 我返咗上床睇咗一陣書後，
正當我準備再次入睡既時候......再次有人拍門 - 又係果位鄰居! 
鄰居告知 - 事發時佢正玩緊電腦，突然聽到外面有人打爛野既聲音，即時望出去 - 正見到打靶仔逃走!
鄰居通知我地後，就一個人行去油站買煙......途中竟然巧遇打靶仔! 於是鄰居上前質問打靶仔頭先做乜打爛人地架車?
打靶仔回答鄰居 - 自稱啱啱先落火車返屋企，之前並唔喺附近!
(半夜3點幾搭咩火車呀? 鬼火車咩??
唔係身有屎洗乜講大話???
)鄰居篤爆打靶仔講大話之後，再不停質問佢; 打靶仔自知事敗，就虛張聲勢大返我鄰居轉頭......
Anyway 鄰居再次拍門係因為......打靶仔大返鄰居轉頭; then 鄰居忍唔住打到打靶仔爆哂缸!
(老公話鄰居手上有血跡!!
) 所以希望老公報警時，唔好向差佬提及佢! 哇哈哈~~~ 佢真係一位守望相助既好鄰居!!
well~ 我並唔係主張凡事以暴逆暴! 我亦唔係鼓吹依種做法! 只係完全唔可以明白依種打靶人個腦唸緊乜? 點解經過人地架車，會突然有衝動要攞舊石扑爛佢??
好不幸依種肆意破壞既人，通常都唔會比差人拉到! 但凡事有因必有果 - 法律制裁唔到依種人，
個天自然會另有安排佢地應得既教訓! 
(哇哈哈~~~~ 突然覺得我鄰居好似Harry Brown!
)差佬啱啱走咗; 我又咁啱打完依篇野，而家去覺覺豬嘞!
不過架車唔渣得，幾粒鐘後老公點返工呢??
沒有留言:
發佈留言