一個人嘆飯 - 2010年4月7日 & 4月8日

4月7日晚餐 - 魚腐魚湯米粉 & 超市中式雞槌

尋晚老公放完工要去headquarter 開會兼政治飯局，所以得返我一丁友食自己!

 清清地整咗大碗魚腐魚湯米粉~
要有芽菜仔墊底~ 仲一定要加大咋莞茜蔥 + 大pat 桂林辣椒醬喎!

 因為想快手有得食，唔想搞咁多野! 所以今次唔用大地魚淆湯，改用家樂牌魚湯精~

 依隻超市既Chinese Style Chicken Drumsticks 好好味!  (已經熟咗! 熱食又得、凍食又得~)

不過£2先得5隻真係賺到佢地笑~~~

雞脾喺英國好鬼平，£2買到double 新鮮生雞槌嘞! 

我決定要自己試吓整依個中式雞槌!! 唔好比超市賺我咁多錢!!!

尋日去買餸時......

 見到原本光禿禿既樹枝開始標嫩芽嘞! 我唸應該唔會再落雪嘞啩!!!?!?!?

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
4月8日午餐 - 豉汁蒸排骨 & 辣椒腐乳

上星期整咗餐豉汁蒸排骨後，覺得唔多夠喉，成日都好想再食排骨~ 所以尋日特別醃定一大碟放雪櫃，想食時蒸熟隨時有得食啦!

又可能因為尋晚無米落肚，今日一起身已經好鬼肚餓，好想食飯......

 啱哂嘞~ 今日lunch 就食排骨啦!

本來仲想炒碟菜......不過最後都係can't be bothered! 整兩磚腐乳算嘞~

 咁大碟我一個人緊係食唔哂啦!!! 不過都食咗半碟~ 剩返既聽日lunch 又有著落!

腐乳我由細到大都係食"廖孖記"既! 初時來到英國發現中英行竟然有"廖孖記"賣，真係令我歡喜若狂!

不過持續買咗幾年正牌"廖孖記"後，有一日我突然發現 - 唔知由幾時開始中英行賣既"廖孖記"，靜雞雞變咗做

"廖孖仔記".......

雖然包裝相似 + 果2個嘜頭都似模似樣，不過我依種精靈師奶仔又點會咁容易比佢地呃到呢?

失去"廖孖記"後既日子，我試過無數唔同牌子既腐乳，不過無一隻及得上"廖孖記".........

大部份台灣牌子腐乳都似未浸夠日子，唔夠香又唔夠腐~

試過一次舊腐乳仲見到豆腐布紋......

大陸腐乳呢? 仲衰! 一味得個鹹字~  最衰果次食落口仲feel 到磨牙既!! 初時以為鹽未溶啦，點知吐出來係白色粗糙既粉末狀物體，估計係石膏粉.........即時成樽揼鬼咗!

唯有都係食返台灣腐乳啦! 起碼無咁恐怖~~~~~

 有次喺泗和行見到依隻香港出品既冠益華記辣椒腐乳~

反正桂林辣椒醬我都係食冠益華記產品既，就買樽腐乳來試吓啦......

好食喎! 雖然仍然唔可以同"廖孖記"相媲美~ 不過除"廖孖記"外，暫時來講係最好既代替品 - 幾香又唔太鹹，夠哂腐又有少少辣!