再戰瑞士卷 - 25%失敗瑞士卷實驗 (2009年7月17日)

有錯，大家今日見到既......仍然係一個甩皮瑞士卷! 而且甩得比尋日果個更嚴重!!!!
 (至於一忽忽果部份，唔係比我搣爛咗~ 只係我為食搣咗來食......)

由於尋日既錯誤 - 我將剛出爐既蛋糕倒扣喺竹砧板上，令蛋糕嚴重甩皮; 於是今日我就將蛋糕倒扣喺牛油紙上面，結果蛋糕甩皮情況更加嚴重!!!!!

我終於明白錯喺邊度! 就係.......

蛋糕出爐後，唔應該即時反轉倒扣!!!!!!!!

(我真係遲鈍~ 同一個錯誤要連續犯2次先明白......)

既然甩皮仲甩得勁過尋日，咁點解今日既失敗只得25%呢?

因為除咗皮既部份之外，我總算figure out 咗以下另外2點:

1. 尋日我照網上一般棉花蛋糕既份量來做瑞士卷，不過份量對於我個11" x 16"既Tala 瑞士卷baking tin 來講好明顯唔夠，令成品太薄!

 今日用咗我自己調較材料份量 + 時間既食譜 - 結果成品厚度啱啱好，而且非常均勻!

2. 低筋麵粉係做棉花蛋糕必需既材料~ 不過英國好難買到低筋麵粉! 就我住既地區來講，只有一間中式超市買到"日清薄力粉"，而且經常缺貨......我用緊既低筋麵粉，都係我從香港帶過來or V媽媽寄比我既!

由於低筋麵粉咁"珍貴"...加上我今次整瑞士卷前仍然未知會唔會成功......所以今次我膽粗粗嘗試用自發粉(self rising flour)!

 蛋糕出乎意料之外地咁軟綿綿!!!! 質感比尋日果個好太多嘞~~~~  (我唸係因為尋日果個唔夠厚，所以發得唔夠好......) 依個新嘗試話比我知道 - 原來可以用自發粉來代替低筋麵粉!!!

今日既實驗令我既"瑞士卷之路"進咗2小步~ 所以今日既失敗指數只得25% - 就係甩皮依part 嘞!

>>>>>>>>>>>>>>>>>>>>>>>>>>>>>>>>>>>>>>>>>>>>>>>

趁住我仲記得自己調較既新份量 + 時間，先喺度記一記低......

 For 瑞士卷baking tin - 11" x 16" (高1"~)

- 材料: 牛油100g, 自發粉(self rising flour)100g, 幼砂糖100g, 粟粉30g, 牛奶100ml, 雞蛋5隻, 幼鹽1/2茶匙, 他他粉(Cream of Tartar) 1/4茶匙

- 方法: 分蛋法

- 焗爐溫度 + 時間: 先預熱焗爐180C焗13分鐘; 最後5分鐘改為160C; 總共需時18分鐘~

>>>>>>>>>>>>>>>>>>>>>>>>>>>>>>>>>>>>>>>>>>>>>>>

經過尋日 + 今日2次唔完全既失敗，

 我好有信心下一次會有一個見得人既瑞士卷!

本來今日都想趁住記憶尤新再焗多個......不過尋晚既半失敗作品，比我最大既fan 屎 - 我老公一野成卷搞掂哂! 今日再來多一塊25%失敗作品.......對老公來講太太太殘忍嘞!!!!  而且.......屋企已冇哂牛油!!!

連我自己聞得多蛋糕香都有少少滯滯地

......所以我決定 - 第3輪既瑞士卷實驗都係留返下星期先進行! 到時我先綜合所有材料 + 步驟，出一個完整既食譜~~~~