自製菠蘿包

今次用咗返香港時買既麵包書 - "香港麵包" (邱勇靈編著)裡面既菠蘿包食譜~ 不過書裡面既食譜份量太多，所以我將材料全部減半; 而且我並冇跟足食譜所有材料 + 做法，材料、做法 + 時間我都自己作出過更改!

做8個菠蘿包......

甜麵包部份:

1. 高筋麵粉224g, 砂糖56g, 即用酵母4g, 麵包改良劑2g, 牛油或豬油20g, 暖水95ml, 牛奶2湯匙, 奶粉1湯匙, 蛋1/2隻, 蛋黃色食用色素少許 (optional~ 所以我冇用!)。將所有材料在盆中混合拌勻。

2. 將麵糰放在撒粉的平面上搓揉。

3. 將麵糰搓揉至麵糰光滑，有彈性而不黏手為準。

4. 將麵糰放在塗油大碗中，蓋上保鮮紙先發酵30分鐘; 取出摺拍數下放氣，再發酵30分鐘。

 麵包改良劑 - 作用可令麵包更柔軟; 唔用麵包改良劑的話，可用湯種來代替~

菠蘿皮部份 + 造型:

5. 低筋麵粉84g, 砂糖56g, 牛油42g, 奶粉7g, 蛋黃1個, 淡奶1湯匙 (我用牛奶!), 臭粉1g, 食用梳打粉少許, 煉奶少許 (無用~), 檸檬黃食用色素少許 (無用~)。將所有材料搓至光滑不黏手後，分成8等份。

6. 將(4)已發酵完成的甜麵糰分成8等份(最好用磅量度~)，將每小份搓成圓球包狀，放在塗油焗盆上，再放入沒開火的焗爐內或蓋上保鮮紙發酵30分鐘。

7. 待(6)的甜麵糰發酵完畢，將(5)的菠蘿皮料輾成圓片，放在每個甜麵糰上。

8. 在包面塗上蛋液。

 9. 放入預熱焗爐200C，焗8至10分鐘至金黃即成。

 食用臭粉 (Ammonia Bicarbonate) - 用作菠蘿皮上裂紋效果~ 要小心控制份量，過量會令成品有怪味!!!! (當然可以完全唔用啦~~~~ )

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

來咗英國咁耐，第一次食到新鮮出爐熱辣辣既菠蘿包~ 而且依個仲係我既"處女麵包" - 第一個親手焗既麵包! 心情緊張又興奮~~~~

一出爐就孤芳自賞一口氣食咗3個.......

不過今次好似落得唔夠臭粉!!??!?! 所以菠蘿皮裂紋唔夠清楚......

 菠蘿皮夠鬆脆，麵包部份好鬆軟~ 好有茶餐廳風味啊!!

繼自製蛋撻之後......又多一樣野唔洗去餅舖買嘞~~~~ 呵呵!!!