2009年7月1日星期三

BBQ @Millport (2009年6月30日)

尋日(6月30日)星期二同損友們去咗Millport BBQ,因為係老公銀行end of the quarter,所以老公請唔到假冇份去......


晨咁早7點幾我都未起身,阿Wing 就send 個sms 過來 - 佢話天氣報告話Millport 會落雨! 到阿Wing 9點半到屋企接我時,個天一直天陰陰,渣車去緊Largs 時仲落毛毛雨......

今次BBQ 有Robert, Pauline + 佢地3位小千金, Kelly, Craig, 阿Wing & 我,大人連小朋友共9人~

損友們大部份都去過Millport - 除咗我 + 阿Wing 之外! Millport 係一個小島來~ 要去Millport 就先要由Glasgow 渣車約1小時去Largs,再搭渡輪過去Millport~ 船程大約只要10分鐘左右。

 我地就係由依度 - Largs (好多屋!).......


 搭渡輪來依度 - Millport~ (完全冇屋!!!)

喺Largs 搭緊渡輪時個天仲係好陰......


 短短10分鐘船程,落船時已見太陽伯伯出哂來!


 天氣越來越好! 藍天白雲~~~~


 第一次來Millport,風景真係好靚!

個個都未食野好鬼肚餓,第一時間拿拿淋搵個靚位置起爐......

 就依度啦! 行落沙灘好方便......

 仲有張枱可以放食物~

 我一攞個爐出來,損友們即時起哄 - 個爐咁細既!!!!!

(唓~ 我一早講咗話係迷你架啦!! )

其實本來Kelly 仲帶咗另一個爐,不過佢男友Craig 唔記得攞出來......

 最後決定搬石頭另起個大d既燒烤爐! 放棄我個超迷你爐仔......

 只得6個大人,小朋友又食得唔多~ 因為個個人都有份預備食物,所以食物真係太太太多......

Robert 整咗豬扒、牛扒、連雞翼都有30隻; Kelly 帶咗蕃薯 + 粟米; 而我就帶咗魚蛋、蟹丸、牛丸 + 竹筒魚蛋、3條courgette、fairy cakes + 蛋撻......

冇錯,最後我都係帶埋d蛋撻去.......個爐未搞掂時,我d fairy cakes + 蛋撻不知幾受歡迎! 個個都話好食~~
_2264.gif picture by veronica_tsim  尤其係小朋友 - Grace + Hannah 每樣食咗2、3個!!

 Kelly 仲帶咗隻西瓜去瓜分!

海邊石上 + 沙上有好多好大隻既"將軍帽" + mussels!!!
 

用石頭大力敲一下,將軍帽就會甩出來! 洗乾淨後直接放喺爐上燒一陣,舊肉就會甩,口感有些少似鮑魚架! 哈哈~~~~~~

我同Kelly 仲攞咗好多mussels 返屋企!


 Kelly 急不及待將攞咗既mussels 燒來食......


 佢仲話好鮮甜好正! Thumbs Up

點知到我食時......

 又來估啱冇獎時間! 大家估下點和我吐返出來? 再估吓白色一粒粒既係乜東東??

(答案如常喺依篇blog 尾! )

由朝玩到傍晚6點幾先執野走人~ 尋日除咗朝早果一陣天陰陰,全日天氣超好! 個個都曬到鴛鴦色......


個個都玩得好盡興! 同3個精力充沛既小朋友玩咗成日,真係好鬼攰~~~~


搭返渡輪過Largs 之後,仲要渣成粒鐘車返Glasgow~ 老公放咗工出Glasgow Centre 接我,返到屋企都成8點幾咯!

老公都未去過Millport,今次佢又冇份去......等我地搵日一齊去先~~~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

大家估到我點解吐返舊mussels 出來未呢?


其實係因為當我食舊mussels 時,初時以為好多沙,點知一吐出來......

原來係珍珠!! 仲有好多粒呢!!!!171253322.gif picture by veronica_tsim

唔知依隻mussels 係咪有錢佬來呢? 竟然收埋咁多珍珠!!!

真係估唔到青口都會有珍珠!

Kelly 食果隻乜都冇,我一食就成口都係珍珠! 中六合彩又唔見有我份喎......

 我會keep 住d珍珠,當做第一次去Millport 既紀念品~~~ (緊係唔係用來鑲戒指啦!! )





11 則留言:

  1. 食青口都有珍珠妳勁 Lucky呀
    英國有冇六合彩之類彩票
    一定要買呀~
    [版主回覆07/02/2009 18:17:00]如果有鑽石仲好!
     
    不過我一向都冇乜橫財運果喎.....
     
     

    回覆刪除
  2. 妳地有無搽防曬呀? 個個都曬到紅卜卜就知個太陽幾勁!
    [版主回覆07/02/2009 18:16:00]我出門口時個天好陰又趕時間,我都唔記得帶防曬去~ 其他朋友都有搽 + 帶咗借比我搽.....不過搽咗都冇用,個太陽大勁嘞~~~~~~
     
     

    回覆刪除
  3. Gaileは林家歐巴桑2009年7月1日 下午7:45

    我都估中左珍珠....你真係好lucky喎,mussels有珍珠我都係第一次知ja,仲要有咁鬼多粒,真係過d luck俾我好喎
    我都估你會帶d撻去架喇,唔通真係要你老公啃晒咁多隻咩,食咁多真係會驚囉 幾時教下我整茄汁mussels呀?我係英國食過間好鬼好食既restaurant,專係食mussels,但係唔記叫咩名,你應該知道,係Covent Garden有一間,我食過幾次,但係唔記得點去同叫咩名喇!你咁叻一定知道點整,教下我煮好喎
    [版主回覆07/02/2009 18:13:00]我唸其實只要係雙殼貝類,都有機會會有珍珠!
     
    哈哈~~~ 我話要老公食哂係講笑既啫! 甜品點可以做晚餐呢?  不過我焗蛋撻果晚,老公即時同我食咗2隻~~~~
     
    我喺Millport 帶咗一袋mussels 返來,我唸住今晚煮~ 不過我唸住用白酒忌廉來煮喎......
     
     

    回覆刪除
  4. yeah,我都估係珍珠,真係估唔到青口都有珍珠喎,咁都比你食到,六合彩你都好快中架啦
     
    環境真係好正呀,係咪連架車一齊渡海呀? 將軍帽我都係第一次聽+第一次見,個樣真係幾似鮑魚喎,好似好正咁  估唔到你地BBQ可以活捉海鮮,即開即燒,引成人啦
    [版主回覆07/02/2009 18:02:00]我好鍾意玩掘蜆呀、釣魚呀.....依d咁既戶外活動架!  我已經唔係第一次喺蘇格蘭攞青口,之前喺另一處叫St Andrews 既地方都攞過好多,仲食唔哂分比朋友呢!  我今次都帶咗一袋青口返屋企,唸住今晚煮! (唔知仲有冇珍珠呢? )
     
    其實Millport 應該仲有好多好靚既地方,不過果日帶住3位咁細既小朋友,好難周圍行得遠~ 我唸住趁依個夏天,搵日同埋老公一齊再去過!
     
    妳有見過將軍帽架? 咁又係~~~ 因為街市唔會有得賣,多數只有住喺 / 去慣海邊既人先知將軍帽! 雖然將軍帽唔係鮑魚,但味道 + 口感都幾似迷你鮑魚架~~~
     
     

    回覆刪除
  5. 食生蠔/蚌有珍珠我就知~乜青口都有架~
    [版主回覆07/02/2009 17:55:00]我都冇唸過原來青口都會有珍珠! 仲有皮光既呢~~~  我唸只要係雙殼貝類,都會有機會有珍珠!
     
     

    回覆刪除
  6. 珍珠定係 mussels BB ?
    [版主回覆07/02/2009 18:58:00]青口BB唔係喺青口裡面架....  而且青口BB係超迷你青口咁既樣架!
     
    珍珠係因為雙殼貝類吸入咗沙石,貝類受外來物刺激就會分泌碳酸鈣包住沙粒令沙粒變圓滑....慢慢就會形成珍珠架嘞~ 所以我唸應該雙殼貝類都有機會會有珍珠!
     
     

    回覆刪除
  7. 嘩~你真係好鬼happy + lucky 既Mrs.T呀~
    成口珍珠~快啲去買六合彩啦~
    [版主回覆07/03/2009 00:07:00]係呀~ 我真係好lucky 呀 - 成口都係珍珠都冇啃死!
     
    我從來都冇乜橫財運既,所以我唸去買都唔會中~ 騎呢果d野就有我份中......
     
     

    回覆刪除
  8. 我都估中左係珍珠呀!!妳地去個個地方好正同好舒服,可惜香港而家好鬼熱,要去類似呢d地方BBQ/郊遊都要等到10月lu...
    其實妳所指的青口,點解咁鬼似鮑魚架?初初係fb睇妳d相仲以為係鮑魚tim,仲係度諗緊妳咁好彩可以有免費鮑魚食,haha!!
    另外,我覺得妳的皮膚好白呀,好鬼羨慕妳啫 .....
    [版主回覆07/03/2009 00:24:00]咁多網友咁叻叻都估中係珍珠既!
     
    其實蘇格蘭都幾多咁靚既地方架! 咪以為依度好過香港好多....最近真係熱到日日都想全天體!!!! 今日竟然有31度呀~~~
     
    唔係....喺袋裡面果d個殼黑黑地果d先係青口(歐洲藍青口); 似鮑魚果d係"將軍帽"來架! 正經名就叫做"帽貝"~ 係一種似似地鮑魚,但唔係鮑魚既貝類! 我細個時喺長洲住,所以知道依d野可以食~~~
     
    好多網友都話過我好白~ 因為我少曬太陽嘛! 不過英國依度唔興白皮膚架,好多人唔曬太陽都會特登去曬太陽燈! 但我始終係港女,所以我都係鍾意皮膚白~~~  不過而家手臂變咗2節色........
     
     

    回覆刪除
  9. 個風景真係好靚,我都想係海邊BBQ
    [版主回覆07/03/2009 00:28:00]果日因為有小朋友喺度,都冇乜機會好好咁真正睇清楚個島~ 我唸住趁依排好天氣,搵日同老公兩個人再去過!
     
     

    回覆刪除
  10. 唔知點解我睇唔到你呢個blog嘅? 咁其實啲珍珠可以做乜呢? 你個到幾點呀? 我零晨四點呀! 你做緊乜呀?
    [版主回覆07/05/2009 04:10:00]睇唔到? 係咪睇唔到相? YBlog 又痴咗嘛!!!
     
    冇呀~ 我唸住keep 住d珍珠做紀念品咋! 咁細粒都做唔到乜野.......
     
    我依度而家晚上9點幾囉~ 而家咪上緊網囉! 本來有個朋友生日party,不過我頭痛唔想去,老公代表我出咗去~
     
    妳咁夜都唔瞓既? 練仙呀?
     
     

    回覆刪除
  11. 尋晚我老公同同村fd十二點幾出咗去嘛, 我自己係屋企幾鬼悶, 咪開咗支紅酒又食咗包薯片, 半支粟米, 仲開咗罐沙甸魚送酒tim, 我send完個留言俾你後無耐佢就番喇!
    [版主回覆07/05/2009 16:59:00]自己一個人喺屋企都咁鬼浪漫開酒飲既~~~
     
     
     

    回覆刪除

Related Posts Plugin for WordPress, Blogger...