豆渣煙肉雜菜蛋餅

最近天氣酷熱 一向少飲汽水既我，近排幾乎隔日就會整一大jug 豆漿! (自製豆漿食譜click here~)


每次整完豆漿，都剩返一大碗豆渣~ 豆渣中仍然含有豐富養分，次次都揼咗佢，感覺好浪費.......

雖然網上見好多人用豆渣來焗麵包，不過我未焗過麵包，亦未有心理準備焗麵包.......

又見到有人用豆渣來蒸蛋 / 煎蛋，於是我就唸咗依個簡單午餐食譜 - "豆渣煙肉雜菜蛋餅"~ 煎蛋餅中加咗豆渣，除咗可以增加飽肚感，煎出來既蛋餅仲會有微微豆香!

生豆渣含有皂豆素，食咗會令人出現肚痛 + 嘔吐等中毒症狀......

 所以用豆渣來煮食前，最好先用白鑊烘乾水份，一來可以清除皂豆素，又可以保存豆渣得比較耐; 而且炒過既豆渣會有更濃既豆香!

1. 煙肉切小塊; 西蘭花切成小丁，用鹽水灼熟後，即放進凍水中保持翠綠備用; 預備罐頭粟米適量。(可隨自己喜好選用不同雜菜~)

2. 雞蛋加入豆渣、忌廉和清水拌勻，用少許雞粉調味。

3. 燒熱少許橄欖油，加入1小塊牛油，下煙肉炒香。

4. 加入雜菜炒勻後，倒入蛋液煎香至兩面金黃。

5. 上碟後灑上新鮮切碎parsley，海鹽和磨碎黑胡椒即成。