The Curious Case of Benjamin Button - 奇幻逆緣 (2009年7月22日)

剛剛睇完"The Curious Case of Benjamin Button".......David Fincher 真係令我好失望!!!

先講講點解我想睇依套戲......

(1) 最主要係David Fincher...erm.......或者應該話係"Se7en"(七宗罪) + "Fight Club" (搏擊會)先啱! 個人覺得David Fincher 所執導既戲水準都幾參差 e.g. 高水準如"Se7en" + "Fight Club"好得好緊要; 但其後既"The Game" + "Panic Room" (房不勝防)就相當麻麻 ......不過每次我聽到David Fincher 個名，都會令我唸起"Se7en"有幾咁好，從而令我有興趣睇David Fincher 既其他作品!

(2) 題材新穎 - 一向大部份有關年齡既奇幻劇情片，都係講主角突然長大變老e.g. Tom Hanks 既"Big" + 劉德華既"童夢奇緣"; 但"奇幻逆緣"剛剛相反，主角Benjamin Button一出生外表反而係老年，越長越後生，甚至變回童年~ 但只限外表，而健康心智就如正常人一樣......依個"倒過來"既題材，就如當年我地港產既"無間道" - "古惑仔混入警隊做臥底"既idea 一樣咁新鮮!

有唔錯既題材，加上對導演有一定信心("Se7en"實在太好嘞!!!)，所以我覺得"奇幻逆緣"應該都會係一部好戲......好可惜 - 期望越大，失望亦越大!

演員方面我覺得個個都演得好出色~ 咁究竟係乜野令我睇到恰眼瞓呢?

"奇幻逆緣"全套戲都令我感覺到好有其他戲既影子，似零碎拼布炒埋一碟既科學怪人! 例如.......

- 一開場用生命就來完結既老婆婆倒敘故事 - 令我唸起Tim Burton 既"Edward Scissorhands" (幻海奇緣)都係用同一手法;

- 不過最似都係"Forrest Gump" (阿甘正傳) - "奇幻逆緣"同"阿甘正傳"同樣以主角第一身來敘述遭遇，見證時代轉變時所發生既事~ 不過導演表達手法高低立見!

- "奇幻逆緣"既女主角Daisy，亦有少少令我唸起"阿甘正傳"裡面既Jenny - 有事發生時，先記起男主角既好......

- "奇幻逆緣"奇幻既程度，又令我唸起Tim Burton! e.g. 開場時果位Mr. Cake 造咗一個時間逆行既時鐘，時鐘一直掛喺車站直至2003年被電字鐘取代......不過Tim Burton既"怪"，係有原因既怪~ 戲完結前一定會對原因有所交代; 但"奇幻逆緣"裡面Mr. Cake 依段故事，我睇唔出同Benjamin 有任何關係........(或者我蠢啦~~~ 不過我覺得就算有關連，表達得實在唔夠明顯!! )

之前喺網上見過有人用"奇幻逆緣"同劉德華既"童夢奇緣"作比較，由於題材類同，所以並唔出奇~ 但我記得睇"童夢奇緣"時，我可以感動到喊到成個豬頭咁; 相反我覺得"奇幻逆緣"完全冇感動位，而且劇情鬆散沉悶，節奏緩慢~~~ 全戲長2小時所表達既並不多，來來去去喺男女主角既關係上兜圈......

 我覺得David Fincher 真係難辭其疚! 如果唔係有Brad Pitt + Cate Blanchett 既演技撐場，相信"奇幻逆緣"會更加不堪......

難怪此戲有13項金像獎提名，只贏得其中3項技術性獎項......