薏米白果腐竹豬肚湯; 瑤柱汁扒節瓜甫; 九層三杯雞 & 白灼芥蘭
本來依餐應該係星期二晚煮既~ 但星期二晏晝老公開完會又玩驚喜早放，搞到我打亂哂整餸時間.......所有冇煮到!
第一次買白果豬肚煲湯~ 我好鍾意依個湯!!!
以前喺香港時，最鍾意去泉章居飲依個湯; 去探婆婆，佢又會煲依個湯比我飲~~~ 不過我自己就未煲過，因為以前冇見到有白果賣，而且之前覺得洗豬肚好麻煩! 死人頭老公拿住碗湯不停索!
事源佢放工返到來話好香~ (我次次煲湯，佢一入門口聞到就話好香...) 咁我話佢知湯 + 餸都係新野! 佢就問我煲乜湯~ 老公唔食內臟，我又唔醒水口快快話佢知係豬肚湯...食飯時佢隔一陣就攞碗湯來聞!!! 真係想塞兩舊豬肚入佢個口!!!!! 誇張到冇佢符~~ 我都不知洗得個豬肚幾乾淨呀!!! 
老公細個時，99煲髮菜湯，62呃老公話用阿姨頭髮來煲湯~ 從此老公唔再食髮菜! 真係掂都唔掂果隻!!!! 我都知老公一向唔食內臟 - 不過其實佢都唔係好識分! 有次喺台灣我買咗串麻辣豬腰~ 我呃老公話唔係內臟 + 叫佢試吓!
(唔記得我話係乜...)，佢食完咪一樣話好味!!!! 但如果事前我話佢知係pig's kidney，佢一定試都唔試! 所以我尋晚話咗比佢知係豬肚...真係好失策!!!!!另外兩個餸 - 節瓜甫 + 三杯雞都係第一次煮~ 節瓜甫原來都唔難喎!! 唔知點解之前我成日都覺得節瓜好難蒸得熟???? 三杯雞好容易，煮起上來成屋都好香! 不過為咗煮三杯雞，我買咗盤新鮮九層塔!! 所以而家廚房有3盤野:仲未渡過危險期既迷迭香、仲未出世既辣椒仔 + 亭亭玉立既九層塔..........
薏米白果腐竹豬肚湯食譜click here~
瑤柱汁扒節瓜甫食譜click here~
九層三杯雞食譜click here~
以前我媽媽煲這個湯會加些白胡椒粒的。
回覆刪除[版主回覆08/08/2008 16:48:00]我知呀~ 不過我冇白胡椒啊!
我婆婆一向煲開都冇落，一樣好味架! 所以我唸可落可唔落~
very 幸福呀, 成日有三餸一湯 !!!
回覆刪除[版主回覆08/08/2008 16:51:00]我煮親中式飯都要有三餸架! 我同 老公為食嘛~
可能我習慣咗 - 以前喺香港我, V媽媽 + V爸爸3個人都係最少三餸....
咁係英國所買到的豬肚是否 "急凍"的呢?
回覆刪除節瓜甫你真係有心機整呀 , 一般要蒸幾耐呢 ?
[版主回覆08/08/2008 16:56:00]係呀! 急凍架~ 依度仲有金錢肚、豬橫脷、豬心......全部都係急凍架! 不過唔知點解豬脷冇急凍呢? 豬脷係新鮮既.......
節瓜甫睇起上來好似好麻煩~ 但只要妳整過就知唔係! 蒸20分鐘左右就得架嘞~~~
yes ar ~~ when I cooked (in the past lu ~~), I also like to have 三餸一湯 for 2 too ~~ but since we both got fat ~~ 好耐都冇呢支歌唱lu ~~ 真羨慕你食極都咁slim ~~~
回覆刪除[版主回覆08/11/2008 20:44:00]其實我都好常會整碟頭既!
我就係要趁而家自己仍然係食極唔肥，要食多d~ 難保將來情況有變嘛! (大吉利是~~~)