Kokuryo - 不知所謂既韓國餐廳! (8月2日)

自從早排既地獄打邊爐之後，星期六又有另一次更加不知所謂既晚餐經驗! 或者下次出街食飯時，應該先查查通勝..........

幾年前"Kokuryo" 既前身本來係一間面積超細既印度咖喱餐廳~ 當時既咖喱餐廳既自助餐又平又好食味~ 我 + 老公成日去食lunch，後來因為搬咗屋，冇去一排...再去時已經變咗而家既Kokuryo 韓國餐廳。據我所知"Kokuryo" 應該係Glasgow 唯一一間韓國餐廳~ 我一向都鍾意食韓國野，"Kokuryo" 既食物都幾好味 + 正宗~ 不過佢地既服務真係嚇鬼 + 超趕客!!!!

先講幾年前 (應該係2005年~)......Kokuryo 大部份侍應都係韓國人，唯獨有一個中年師奶 - 個樣似韓國人，但會講廣東話! 不過講得唔正，似有大陸口音~ 唔知佢係識講中文既韓國女人; 還是嫁咗韓國人既大陸女人? 因食物好正宗，但個中年師奶款似老闆娘! 依個中年師奶長期黑面，執到金都唔識笑就係依隻嘞~~ 好似全世界人欠咗佢 + 唔想撈咁既款! 完全面目可憎!

初開張既Kokuryo 午餐有做自助餐，我同老公一唸唔到食乜，就會去Kokuryo 食午市自助餐。當時我仲係學生，有一本叫做"Snapfax"既學生優惠証，裡面有Kokuryo 既優惠 - 整個學年total bill 半價。問題來嘞 - 當我唔知第2次定第3次用半價優惠時，中年師奶走來同我講: 半價優惠只係比一個人架咋! (當時我係學生，但老公唔係!) 有冇再夾硬d呀??? Snapfax 上面白紙黑字寫到明"Total Bill"半價架喎! 真係要同佢拗既話，佢一定點都講唔通! 不過我亦有常識 - 知道offer 依家野，最終決定都係喺餐廳management 度!! 人地貪口爽亂出offer，到有人claim offer 時又要反口...人地孤寒小家但我唔係 - 所以我冇同佢拗之外，仍然繼續去幫襯! 直至有一次，我 + 老公再去食午市自助餐，當時入到去一個客都冇.....

黑面八婆: 午市自助餐就快做完 + 唔會再加食物，晚市要到6pm (個零鐘頭後)先開始...你地可以order 餐牌菜?

我: 咁我地個零鐘後再返來食晚市啦......

黑面八婆: 點解你地唔試吓餐牌既?

我: 因為我想食自助餐囉!

我地就推門走，唸住6pm 返去食晚市...依個時候比我見到黑面八婆藐咀! 我一向唔鍾意人焗我食乜or 買乜!!! 究竟而家我係客定佢係客呢?? 其實我地之前都試過叫餐牌菜，係佢自己話師父喺韓國未來，所以做住自助餐先，等師父到咗就唔再做自助餐只做餐牌.......咁啱啦~ 藐我就慳返 - 去食KFC!!

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

自從05年果次，我地一直冇再去過Kokuryo! 直至星期六我衰為食~ 可能因為早幾日睇咗"食客"啦.......咁今次佢地又衰咩呢?

- 入到去裡面當時只得2個客，問我地有冇訂位? 我地後面仲有2個外國客，但佢又冇問佢地有冇訂位喎! (我地冇訂位咪又係比我地坐~~~ 多餘!) 黑面八婆同我地落完單，冇say thank you; 外國人落完單呢，就thank 到慌死人地聽唔到.....佢真係爭在未喺門口貼住"中國人與狗，恕不招待"!!

- 我地叫咗石頭飯、泡菜、辣牛肉湯、魷魚炒豬肉....但大家見到今次冇相睇 - 因為有侍應走來話我知"影咗相唔可以放上網"! 即係咁~ 唔影相唔係問題! 我已經話咗OK，我只係比自己睇 + 唔會放上網...但佢仲不停喺度講! 仲話佢地有"trademark registration"喎，如果喺網上見到佢地既食物相，可以法律追究!!!! 嚇鬼咩? 石頭飯 + 辣牛肉湯你地發明架???? 點trademark 呀??? 我已經話咗OK唔會擺上網，仲trade 咩mark 呀??? 一係佢地學倫敦"The Ivy"咁 - 完全唔比人影相囉! (吹~~~~~) 就算我真係放相上blog，我又真係想睇吓佢地告我乜呀??? 不過人地既然"唔比"，我亦無謂同人地賣廣告........食物係就係幾好味! 不過可能只係因為冇比較，而且泡菜得個酸字~~~~~

- 戲肉來嘞......當我食石頭飯食咗一半，Wow~ 有頭髮喎! 仲要有2條!!!!!! 我真係即刻乜胃口都冇哂~~~~ 黑面八婆走過來，老公話佢知飯裡面有2條頭髮，黑面八婆望住我3秒...跟住攞起碗飯話:OK! > 走咗!

哇! 食物裡面有異物都唔係第一次，我之前食過意粉裡面有烏蠅添! (點解次次都係我????) 但一句道歉都冇，仲要話"OK"...就真係第一次囉!!!! 轉頭走來問我: 想要過碗定除消個order?

 你話呢? 你覺得我仲有胃口咩??? 緊係埋單走都走唔切啦!!!
睇黑面八婆一副難以置信既樣，有理由相信 - 佢會覺得因為佢叫我唔好影相，所以我條氣唔順而特登"屈"佢話食物裡面有頭髮! (唔怪之唔想人地影相啦.......

) 隨便你啦~ 反正我一定唔會再去Kokuryo! 估唔到過咗成3年再去Kokuryo，雖然仲未執笠...但佢地既customer service 仍然係咁唔掂!!!! 食物幾好食都冇用，況且講好食既韓國野又未輪到佢! I've had better 囉~~~ (much better!!!)
無謂貼錢買難受!!!