Gypsy Lee 既水晶球

好多人喺人生唔如意既時候，會傾向用比較靈異既方法，希望知道自己將來既人生會係點! 可能係一種自我安慰，希望知道自己既將來會有轉機...我亦唔例外!

大約10年前，just before 我認識老公，當時係我一生人最黑仔既時候! 果時啱啱同前男友分咗手; 又剛剛做完智慧齒手術，冇返學一段時間，功課追唔上; 當時我既好朋友M又將快離開Glasgow，去加拿大做交換生1年..........

喺M臨離開Glasgow 前，佢去咗見一個叫做"Gypsy Lee"既阿婆~ Gypsy Lee 係一個Glasgow 相當出名既fortune teller - 類似睇相 / 問米婆之類...M見完佢之後，同朋友講佢既經歷 - Gypsy Lee 講得出佢快將離開自己出生既地方一段時間! (M喺Glasgow 出世~) 一時間個個朋友都去幫襯~ 而且個個都對Gypsy Lee 所講既野既準確程度嘖嘖稱奇! 當時M見我咁唔開心，於是建議我去見Gypsy Lee........

要見Gypsy Lee 係唔需要預約，只要喺店裡面等! 佢既店經常排長龍，你等得就等啦~ 佢生意唔憂做!!! 當日M陪住我一齊等咗個幾鐘，平時Gypsy Lee 只肯單對單，不過Gypsy Lee 認得M，佢破例比M 陪我一齊入房............

當時既Gypsy Lee 係一個大約50、60歲，咀唇生鬚 + 略胖既阿婆...佢一見我 + M，就同我地講: 妳地唔係姐妹~ 不過妳地同對方好close，有乜都會同對方講! (係真既!)

Gypsy Lee 既服務包括睇掌、水晶球 + 塔羅牌~ 價錢由£25至£30不等 (10年前個價)，視乎佢睇到幾多，可以講幾多比你知....一般大約30分鐘左右。我揀咗睇水晶球......

開始時Gypsy Lee 叫我伸出雙手，放咗個水晶球喺我手上，叫我喺心入面誠心問自己想知道既野 (唔洗講出聲~)，問完就話佢知OK~ 我喺心裡面問完"自己將來人生會係點?"之後，就將水晶球交返比Gypsy Lee，成個過程入面，我一句有關自己既野都冇講過! 之後完全係Gypsy Lee 講野，我只需要講yes or no~ 以下係Gypsy Lee 當時對我講既說話......

- 我雖然唔係生於有錢家庭，但我由細到大都衣食無憂，要乜有乜...著得暖 + 食得飽; (係真既!)

- 我細個時父母想過離婚，但後來冇事; (真既! 我小學4年級既事~ 依個時候覺得有d驚 - 太準!!!)

- 我唔係獨生女 - 依個時候我同Gypsy Lee 講: 唔係~ 我係獨生女! Gypsy Lee 停咗 + 唸咗一陣，再用好肯定既語氣同我講: 冇可能~ 妳一定有brother or sister! 妳知唔知道妳媽媽有冇小產 / 墮胎? (有! 我5歲果年，V媽媽意外有咗但冇要到.....依個時候更驚!! 咁妳都知??)

- 我剛剛完咗一段感情~ 對方曾經深愛過我，其實對方仲係愛我 + 關心我，但對方覺得我管得佢太緊 + 抖唔到氣，而且對方當時好confused，不過對方唔係我真命天子，我係時候要放手; (我當時喊咗出來! 我ex 真係講過我綁得佢好辛苦......)

- 我唔洗擔心~ 因為真命天子好快會出現! 但我地會有好多波折...不過我地最終會結婚 + 我將會好幸福! 真命天子會全心全意愛我...我地雖然唔會大富大貴，但會有自己屋，有自己車，唔洗憂柴憂米...我將會有一個好幸福既家庭...我地將會有3個小朋友，第一個係仔.....(約1年多後我就認識咗老公~ 我地真係經歷過好多之後結埋婚! 冇大富大貴 - 係!

 但有自己屋 + 自己車，唔洗憂柴憂米 - 都係! 小朋友依part 就未知住嘞......)

- 真命天子既名有6個英文字母，其中一個係"A"! (Gypsy Lee 冇講A係第幾個英文字...不過老公個名叫"Andrew"!!!! 只係佢鍾意人地叫佢做"Andy".......)

- 我將會有機會遠行 - 地點係加拿大! (當時我心唸: 阿婆妳唔係吓哇? 我朋友M去加拿大啫，妳見我同佢friend...我又去埋一份???? 我開始有d唔信......)

>>>>>>>>>>>>>>>>>>>>>>>>>>>>>>>>>>>>>>>>>>>>

我所記得大約係咁多~ 當時半信半疑! 信係因為Gypsy Lee 講得出我背景; 疑係因為我當時根本冇打算去加拿大!

朋友們知M帶我見過Gypsy Lee，八卦走來問我佢講乜~ 當時我未識老公...但有個叫"Eddie"既男仔追緊我，不過我完全對佢冇興趣......

朋友們: 妳好快d講邊個係"6個英文字母"咯喎!!!!

我: 我點知啫?????

朋友們: 妳唔講我地就當係"Eddie"架嘞!

我: "Eddie"得5個英文字之嘛~ 都冇"A".......

朋友們: "Edward"咪6個英文字囉.....又有"A"!!!! ("Eddie"係"Edward"既簡稱......)

   朋友們爆笑!!!    

我: X%#Z%&..........

我見完Gypsy Lee 之後，冇同過V媽媽講我去睇水晶球~ 因為V媽媽會鬧鬼我嘥錢!!  

見完Gypsy Lee 之後幾個月，我仲未認識老公...V媽媽知我同ex 分咗手唔開心，可能想同我去散心......所以同我講 - 我暑假返香港時會同我一齊去加拿大探佢朋友!!!!

到現時為止，Gypsy Lee 所講既野，除咗'我地會有3個小朋友"依part 仲係未知之外，其他野全部都好似已經應驗咗........... 

>>>>>>>>>>>>>>>>>>>>>>>>>>>>>>>>>>>>>>>>>>>>>

後記:

- 雖然我一向婆仔相信鬼神...但我唔覺自己係迷信既人! 不過Gypsy Lee 既經歷我冇辦法解釋得到!!! 我覺得我而家生活得好開心，我唔會想知道將來既事! 我唔會再去見任何fortune teller.......

- 我大學時曾經同同學討論過Gypsy Lee 既經歷，發現真係好多人幫襯過佢! 而且個個都話佢準~~~ 聽聞佢已經退休 + 搬咗舖，由佢個女接手，不過佢個女冇料到......